Posta Shqiptare nënshkruan marrëveshje me “Luarasin”

Posta Shqiptare nënshkruan marrëveshje me “Luarasin”

Studentët do të mund të bëjnë praktikën tek Posta Shqiptare

Posta Shqiptare nënshkroi një marrëveshje me Universitetin Luarasi, sipas të cilës, studentët e këtij të fundit do të kenë mundësi të bëjnë praktikën e punës tek kompania publike Posta Shqiptare. Gjatë nënshkrimit të marrëveshjes, Drejtori i Përgjithshëm i Postës Shqiptare, z. Majlind Lazimi, u shpreh mjaft i kënaqur për këtë marrëveshje sepse Posta Shqiptare, me anë të kësaj marrëveshjeje vë në zbatim përgjegjësinë e saj sociale në të mirë të komunitetit, duke u ofruar studentëve një ambjent dinjitoz ku ata të mund të vënë në praktikë të gjitha njohuritë teorike në fushat mësimore që ofron Universiteti Luarasi. “Nga sot, studentët e Universitetit Luarasi do të kenë mundësi të shohin nga afër realizimin e të gjitha shërbimeve postare dhe financiare që ofron Posta Shqiptare si një nga institucionet lider në ofrimin e këtyre shërbimeve. Kjo do të jetë një vlerë e shtuar për Postën Shqiptare, sepse krijon hapësira të mira për studentët, që në një të ardhme, pse jo, të mund të bëhen pjesë e kompanisë tonë në nivel administrativ, në perputhje të plotë me vizionin tonë për rekrutimin e studentëve të shkëlqyer. Uroj dhe shpresoj për suksese të mëtejshme” – tha z. Lazimi. Nga ana e tij, Dekani i Fakultetit Juridik në Universitetin Luarasi, z. Darjel Sina, tha se kjo është një mundësi shumë e mirë për studentët e Universitetit Luarasi, pasi Posta Shqiptare është një kompani mjaft e fuqizuar dhe me impakt të gjerë, duke pasur parasysh edhe numrin e madh të punonjësve që ka. “Studentet, me anë të praktikës në këtë kompani do të marrin përvojën që do u shërbejë në ndërtimin e karrierës së tyre. Falenderoj Drejtorin e Pergjithshëm të Postës Shqiptare, z Majlind Lazimi për këtë mbështetje ndaj studentëve dhe uroj që ky bashkëpunim të jetë i frytshëm në të ardhmen” – përfundoi z. Sina.