Organet Drejtuese

Organi 01

Rektorati

Rektorati i Universitetit “Luarasi” është strukturë e parashikuar në Nenin 18 të Rregullores së brendshme të Universitetit.

Roli dhe funksionet e Rektoratit janë përcaktuar në përputhje me parashikimet e Nenit 40 të Ligjit Nr. 80/2015, datë 22.07.2015, “Për arsimin e lartë dhe kërkimin shkencor në institucionet e arsimit të lartë”.

Si organ kolegjial ekzekutiv, Rektorati përbëhet nga Rektori, Zëvendësrektori/ët, Dekanët/Drejtuesit e Njësive Kryesore dhe Administratori i Universitetit.

Funksionet kryesore

Harton Planin Strategjik të zhvillimit të institucionit.
Harton Programin Vjetor të veprimtarive mësimore dhe kërkimit shkencor.
Ndjek zbatimin e Programit Vjetor pas miratimit në Senatin Akademik.
Zbaton vendimet e miratuara nga Senati Akademik dhe Bordi i Administrimit.
Monitoron dhe publikon rezultatet e vlerësimit të veprimtarive të institucionit.
Propozon strukturën e përgjithshme institucionale.
Propozon kategoritë e personelit akademik që nevojiten sipas niveleve të programeve të studimit.

Mbledhjet e Rektoratit

Mbledhjet thirren nga Rektori ose nga të paktën dy prej anëtarëve të Rektoratit.

Organi 02

Senati Akademik

Senati Akademik është organi kolegjial më i lartë akademik i Universitetit “Luarasi”, përgjegjës për përmbushjen e misionit të Universitetit.

Senati Akademik është i parashikuar në Nenin 12 të Rregullores së brendshme të Universitetit dhe funksionet e tij përcaktohen në përputhje me Nenet 37 dhe 38 të Ligjit Nr. 80/2015, datë 22.07.2015.

Senati i Universitetit “Luarasi” përbëhet nga 25 (njëzet e pesë) anëtarë.

Përbërja e Senatit

Rektori i Universitetit dhe drejtuesit e njësive kryesore janë anëtarë ex officio.
Katër anëtarë të personelit akademik të secilës njësi kryesore.
Katër përfaqësues të studentëve.

Zgjedhja dhe mandati

Anëtarët e Senatit zgjidhen nga asambletë e personelit akademik të njësive kryesore, përmes një votimi të përgjithshëm, për një mandat 4 (katër) vjeçar, me të drejtë rizgjedhjeje, midis anëtarëve të personelit akademik me kohë të plotë, të vetëkandiduar.

Kriteret për anëtarësim

Anëtarët e Senatit i përkasin kategorisë “Profesor”, ose kanë gradën shkencore “Doktor” (PHD), të fituar pranë universiteteve të vendeve anëtare të OECD-së ose BE-së.

Përgjegjësitë kryesore

Garanton autonominë e Universitetit.
Garanton lirinë akademike.
Garanton të drejtat e studentëve.
Siguron cilësinë e brendshme.
Propozon planin strategjik të zhvillimit të institucionit.

Baza ligjore dhe rregullatore

Organet drejtuese të Universitetit “Luarasi” janë përcaktuar në Statutin e Universitetit “Luarasi”, të miratuar me Urdhër të Ministrit të Arsimit dhe Sportit Nr. 502, datë 08.09.2023, “Për miratimin e Statutit të Universitetit “Luarasi””.

Ato janë përcaktuar gjithashtu në Rregulloren e brendshme të Universitetit “Luarasi”, të miratuar me vendim të Senatit Akademik Nr. 17, datë 13.11.2023.

Organizimi mbështetet në parashikimet ligjore të Kreut V, “Organizimi akademik dhe administrativ i institucioneve të arsimit të lartë”, përkatësisht Nenet 36, 37, 38, 39 dhe 40 të Ligjit Nr. 80/2015, datë 22.07.2015, “Për arsimin e lartë dhe kërkimin shkencor në institucionet e arsimit të lartë”.