Universiteti “Luarasi” e ushtron veprimtarinë kërkimore përmes katër njësive kryesore, siç janë Fakulteti i Drejtësisë, Fakulteti Ekonomik, Fakulteti i Teknologjisë së Informacionit dhe Inovacionit dhe Fakulteti i Shkencave Mjekësore, si dhe departamentet e tyre respektive.

Në përbërje të këtyre fakulteteve është një staf akademik me eksperienca të gjata të mësimdhënies akademike dhe kërkimit shkencor. Duke pasur parasysh se kërkimi shkencor është një nga tre misionet e institucionit të arsimit të lartë, Universiteti “Luarasi” e mbështet veprimtarinë e tij kërkimore në Strategjinë e Kërkimit Shkencor, e cila miratohet çdo vit nga Senati i Universitetit.

Stafi akademik i Universitetit “Luarasi” aplikon rregullisht në thirrjet për projekte që hapen çdo vit nga Agjencia Kombëtare për Kërkim Shkencor dhe Inovacion (AKKSHI), në kuadër të projekteve kombëtare për kërkim e zhvillim dhe projekteve të bashkëpunimit shkencor dypalësh.

Universiteti “Luarasi” ka qenë fitues i disa prej këtyre projekteve, ku përmenden projekti i mbështetur nga AKKSHI për pedagogjinë korrektuese në sistemet e vuajtjes së dënimit për të miturit, si dhe projekti për Energjinë e Rinovueshme, i cili promovon energjinë diellore dhe zhvillon strategji të qëndrueshme energjetike.

Stafi akademik i Universitetit “Luarasi” ka qenë i përfshirë dhe ka shprehur interes si institucion partner në Programet e Bashkimit Evropian për Kërkim Shkencor dhe Inovacion.